ប្រែសម្រួល៖ ស-សម្បត្តិ
វិបត្តិរបួសរបស់ Real Madrid នឹងបន្ថែមកម្លាំងចិត្តសម្រាប់ការប្រកួត Champions League វគ្គ១៦ក្រុមចុងក្រោយរបស់ពួកគេ ការប្រកួតជើងទីមួយនៅ RB Leipzig នៅថ្ងៃអង្គារនេះ អ្នកចាត់ការ Carlo Ancelotti បាននិយាយនៅពេលពួកគេបន្តការប្រកួតសម្រាប់យកឈ្នះពានរង្វាន់អឺរ៉ុបលើកទី 15 ។

Madrid ដែលនាំមុខតារាង LaLiga បន្ទាប់ពីបរាជ័យមួយប្រកួតក្នុង 24 ប្រកួតក្នុងលីក ធ្វើដំណើរទៅកាន់ក្រុម Bundesliga ជាមួយនឹងបញ្ហារបួសជាច្រើន។ ខ្សែបម្រើ Jude Bellingham គឺជារបួសចុងក្រោយបង្អស់ បន្ទាប់ពីត្រូវបានគេធ្វើរោគវិនិច្ឆ័យថា មានការប៉ះទង្គិចនៅកជើងខាងឆ្វេង។

កីឡាករជម្រើសជាតិអង់គ្លេសវ័យ 20 ឆ្នាំរូបនេះមានរដូវកាលដ៏អស្ចារ្យចាប់តាំងពីផ្ទេរទៅ Santiago Bernabeu ពី Borussia Dortmund ក្នុងតម្លៃ 103 លានអឺរ៉ូ ហើយបានស៊ុតបញ្ចូលទីបាន 4 គ្រាប់ក្នុងការប្រកួត Champions League ចំនួន 5 ដង។

អ្នកចាំទី Thibaut Courtois និងខ្សែការពារ Eder Militao និង David Alaba អវត្តមានរយៈពេលយូរដោយសាររបួសសរសៃចងជង្គង់។ប៉ុន្តែ Ancelotti មានទំនុកចិត្តថា Real អាចយកឈ្នះលើការបរាជ័យនេះ។

គាត់បានប្រាប់អ្នកយកព័ត៌មានកាលពីថ្ងៃចន្ទថា “ខ្ញុំមិនដែលគិតអំពីអ្នកដែលមិននៅទីនេះទេ” ។ “គ្មាន Bellingham ទេ ប៉ុន្តែបើគ្មានគាត់ទេ ពួកយើងបានឈ្នះ 4 ក្នុងចំណោម 4។ របួសទាំងនេះគឺជាឱកាសមួយដើម្បីលើកទឹកចិត្តបន្ថែមទៀត។ យើងអាចធ្វើបានល្អនៅពេលប៉ះ Leipzig ។”យើងកំពុងរត់បានល្អ មានការលើកទឹកចិត្ត នៅក្នុងការប្រកួតដែលយើងចូលចិត្តច្រើន… “ក្រុមអាល្លឺម៉ង់ស្ថិតក្នុងចំណាត់ថ្នាក់លេខ៥ក្នុងក្របខ័ណ្ឌ Bundesliga។

លោក Ancelotti បានបន្ថែមថា “ពួកគេគឺជាគូប្រជែងដ៏ខ្លាំងមួយ ពួកគេលេងយ៉ាងស្វាហាប់ និងប្រកបដោយគុណភាព។ យើងនឹងលេងហ្គេមពេញលេញ ជាពិសេសការការពារ” ។“ខ្ញុំឃើញក្រុមមួយ (Real) រឹងមាំ ម៉ឺងម៉ាត់ មានការលើកទឹកចិត្ត មានបរិយាកាសល្អ គ្មានអ្នកណាត្អូញត្អែរ គ្រប់គ្នាចូលរួម…។

លោកបានបន្ថែមថា “អ្វីៗដំណើរការល្អរហូតមកដល់ពេលនេះ ទោះបីជាយើងជួបការលំបាកទាំងអស់ក៏ដោយ… អរគុណចំពោះចរិតលក្ខណៈរបស់កីឡាករ” ។

លោក Ancelotti ក៏ត្រូវបានសួរអំពីអនាគតរបស់ Toni Kroos របស់ Real នៅក្លិបផងដែរ ខណៈដែលកិច្ចសន្យារបស់ខ្សែបម្រើសញ្ជាតិអាល្លឺម៉ង់វ័យ 34 ឆ្នាំរូបនេះនឹងផុតកំណត់នៅក្នុងខែមិថុនា។”ទោះជាគាត់សម្រេចចិត្តយ៉ាងណា អ្នកត្រូវតែគោរព។ មួយខ្ញុំគិតថាត្រូវទុកវាឱ្យនៅកំពូល។ ឆ្នាំនេះគាត់អាចឬឆ្នាំក្រោយខ្ញុំមិនដឹងទេ ព្រោះការសម្តែងរបស់គាត់តែងតែល្អ” ៕
ប្រភព៖ Reuters